Alríkisdómari í Maryland setti í gær bráðabirgðalögbann á að Trump-stjórnin geti framfylgt nýrri tilskipun sem takmarkar hverjir öðlist sjálfkrafa bandarískan ríkisborgararétt við fæðingu. Nokkrir mannréttindahópar höfðuðu málið eftir að Donald Trump forseti undirritaði tilskipun 6. ágúst sem hann sagði beinast gegn ,,fæðingartúrisma".
Stephen Miller, einn helsti ráðgjafi Trumps, sagði þá að tilskipunin eyddi ríkisborgararétti barna meðlima hryðjuverkasamtaka og fjölmenns hóps sem grafið hafi undan hagsmunum Bandaríkjanna.
Trump sagði fjölda útlendinga koma til Bandaríkjanna í þeim tilgangi einum að fæða þar barn, sem fengi þá sjálfkrafa ríkisborgararétt. Hæstiréttur hafði komist að þeirri niðurstöðu að fyrri tilraunir forsetans til að skerða fæðingarréttinn brytu í bága við stjórnarskrána.
Alríkisdómarinn tók undir það og sagði öll börn fædd í Bandaríkjunum eiga stjórnarskrárvarinn rétt á ríkisborgararétti í 35 blaðsíðna úrskurði.
Með fyrstu tilskipuninni hugðist Trump koma í veg fyrir að börn fólks í ólöglegri dvöl eða með tímabundna vegabréfsáletrun öðluðust sjálfkrafa ríkisborgararétt. Hún var stöðvuð á lægri dómstigum með vísan til stjórnarskrárinnar og Hæstiréttur staðfesti það.
Tilskipanirnar eru hluti af þeirri vegferð forsetans að fækka innflytjendum. Hann hefur einnig fyrirskipað brottflutning milljóna skilríkjalauss farandfólks og afnumið vernd gegn brottflutningi ríkisborgara á annan tug landa. Samtök sem berjast fyrir réttindum innflytjenda fögnuðu niðurstöðunni.
Fjórtándi viðauki stjórnarskrárinnar, sem gerður var að loknu borgarastríðinu á 19. öld, tryggir öllum fæddum í Bandaríkjunum ríkisborgararétt, með nokkrum undantekningum, þar á meðal gagnvart börnum erlendra sendifulltrúa.
