Vésteinn Hafsteinsson hefur ákveðið að snúa aftur í þjálfun til að aðstoða kringlukastarann Hjálmar Vilhelm Rúnarsson.

Eftir farsælan feril sem kastþjálfari þar sem hann þjálfaði meðal annars tvo Ólympíumeistara í kringlukasti hætti Vésteinn að þjálfa 2023. Hann ákvað að byrja aftur í sumar þegar hann sá efnilegan íslenskan kringlukastara frá heimabæ sínum Selfossi.

Vésteinn, sem býr í Svíþjóð, var hér á landi í vikunni að þjálfa Hjálmar.

,,Ég ákvað að gera þetta og neita mörgum öðrum í staðinn. Bara út af því að strákurinn er frá Selfossi," sagði Vésteinn.Vésteinn Hafsteinsson var einn fremsti kringlukastsþjálfari heims. Hann hætti að þjálfa 2023 en er snúinn aftur til að aðstoða hinn unga og efnilega Selfyssing Hjálmar Vilhelm Rúnarsson.

Draumur margra

Vésteinn er Selfyssingur og rann blóðið til skyldunnar. Hann hleypur ekki til og aðstoðar hvern sem er en telur Hjálmar mikið efni. Hann vill ekki setja of mikla pressu á hann.

,,Ég sá hann í sumar og ákvað bara aðeins að forvitnast um hans hæfileika," sagði Vésteinn. ,,Af því að strákurinn er frá Selfossi og Íslendingur. Þá er bara hjartað hér. Þá fannst mér dálítið áhugavert hvað hann kastaði á Meistaramóti Íslands."

,,Þetta er bara frábært. Það er geggjað að fá Véstein sem þjálfara. Það er draumur margra," sagði Hjálmar.

,,Ég er ekkert að segja að hann muni fara alla leið í þessu. Ég vil ekkert vera að setja þá pressu á hann núna. En ég er fyrst og fremst að opna dyrnar að þeim möguleika," bætti Vésteinn við.

Hvernig verður þetta?

Hjálmar hefur bakgrunn í tugþraut en ætlar að helga sig kringlukastinu. Ingvi Karl Jónsson og Rúnar Hjálmarsson þjálfa hann samhliða Vésteini. Ingvi og Rúnar stýra æfingum í höllinni á Selfossi en Vésteinn aðstoðar í gegnum fjarfundabúnað.

Þá fer Hjálmar í æfingaferðir til Svíþjóðar til að vera undir handleiðslu Vésteins.

Hjálmar er einungis 18 ára og næstu ár fara í að byggja upp tæknina hjá honum. Kringlukastarar ná yfirleitt hátindinum 26-32 ára.

Hversu langt kastar Hjálmar?

Hjálmar varð í öðru sæti á Meistaramóti Íslands í sumar með kast upp á 45,56 metra.

Til samanburðar kastaði Guðni Valur Guðnason, fremsti kringlukastari landsins, 60,63 metra á Meistaramótinu. Hans besta kast, 69,35 metrar, er frá árinu 2000.

Hverjir eru Ólympíumeistararnir hans Vésteins?

Vésteinn þjálfaði Eistann Gerd Kanter sem fékk gull á Ólympíuleikunum í Peking í Kína 2008.

Svíinn Daniel Ståhl varð einnig Ólympíumeistari undir handleiðslu Vésteins á Ólympíuleikunum í Tókýó í Japan 2020. Vésteinn þjálfaði einnig Simon Pettersson sem fékk silfur á sömu leikum.

19.10.2026 06:00