KR tryggði sér endanlega annað sæti í Bestu deild karla í fótbolta í dag. Vesturbæingar unnu 2-3 sigur gegn Keflavík suður með sjó í dag.

Keflvíkingar enda í 6. sæti sem nýliðar, en nú er ljóst að þeir geta ekki náð ÍA sem er í 5. sæti.

KR komst yfir snemma leiks er Galdur Guðmundsson skoraði á 8. mínútu. Ástbjörn Þórðarson tvöfaldaði forskotið eftir undirbúning Galdurs á 29. mínútu.

Staðan var 0-2 í hálfleik en heimamenn lögðu ekki árar í bát. Þeir jöfnuðu með tveimur mörkum á skömmum kafla. Stefan Alexander Ljubicic minnkaði muninn á 49. mínútu og Dagur Ingi Valsson jafnaði metin tveimur mínútum síðar.

Gabríel Hrannar Eyjólfsson skoraði sigurmarkið á 89. mínútu eftir undirbúning Arnórs Ingva Traustasonar.

KR er nú með 53 stig í 2. sæti þegar einn leikur er eftir. Fram er í 3. sæti með 46 og mætir ÍA á mánudagskvöld.

Hvað þýðir 2. sætið?

Munurinn á 2. og 3. sæti er að KR situr hjá í eina umferð í Sambandsdeild Evrópu á næsta ári en Fram fer í fyrstu umferð. Vesturbæingar fá hins vegar verðlaunafé fyrir fyrstu umferð.

17.10.2026 14:16